Ll'anema mia arrassumiglia ô mare, 
i' mme ce tuffo faccenno 'a palummara. 
'Stu mare ca s'atturciglia 'int'a ll'onne... 
mentre è na tavola, po' struppea 'e ssponne. 
Quanno tenco dinto 'e mmareggiate, 
schiaffeo e vvotto cavece pe 'e scoglie. 

'O cielo se fa scuro...niro, se ncupisce 
e ttutto chello ca vede ll'arravoglia. 
Sott'â luna chiena abbrillo, mme sfezzeo, 
si me ncazzo, chello ca trovo 'o sbrunzuleo. 
Quanno mme sento dinto 'o ffuoco: 
s'appicciano ncielo 'e llumminnarie, 

vanno piglianno culore e poco a ppoco, 
se tegne 'e arcobaleno tutta ll'aria. 
Nun 'o pozzo cuntrullà tutto 'stu mare, 
ca m'affonna e mme fa spisso tremmà: 
s'aggita, me sbrunzulea, m'accavalla 
dint'â spumma janca mme fa annaspà. 

Quanno so' felice e 'o mare è cchiaro, 
i' lasso a rriva cunchiglie e stelletelle: 
se ne regnene sicchie chine 'e ffigliole, 
pe nne fa bracciale, ricchine e ccullanelle. 
'E notte po'...quanno 'o mare se fa scuro, 
llà...mme metto troppa, assaje paura. 

Mme ne vaco ncerca 'e nu miraggio, 
m'attacco a n'ancora pe mme fa curaggio. 
Nun ô saccio cuntrullà tutto 'stu mare, 
ca se sfezzea a mme dà strattune, scosse... 
ma nfin'a qquanno ll'anema mia vo' sfrennesià, 
continuo a mbarcà acqua e scanzà fuosse.